“Azadlıq-2015” müzakirə etdi- “Vəziyyət yaxşı deyil!”

Paylaşılma tarixi: Apr 08, 2015 3:14:56 PM

Aprelin 8-də “Azadlıq 2015” seçki blokunun təşkilatçılığı ilə “Dəyişən dünya və Azərbaycan: mövcud durum və perspektivlər” adlı dəyirmi masa keçirilib. Musavat.com-un xəbərinə görə, dəyirmi masada bloka daxil olan səkkiz partiyanın- KXCP, “Azadlıq”, AzDP, AXP, ALDP, VİP, BAP və “Aydınlar” Partiyasının təmsilçiləri iştirak ediblər. Blokun üzvü olmayan digər partiyaların təmsilçiləri də tədbirə qatılıblar. O cümlədən Müsavat Partiyasının təmsilçisi Arzu Səmədbəyli də tədbirdə iştirak edib. Həmçinin tədbirə tanınmış ekspertlər, politoloqlar da qatılıb. KXCP sədri Mirmahmud Mirəlioğli tədbir barədə məlumat verərək bildirib ki, dünyada gedən proseslərin Azərbaycana ciddi təsirləri olacağı şübhəsizdir. Bu səbəbdən baş verəcək, gözlənilən dəyişiklikləri müzakirə etmək vacibdir.  AzDP sədri Sülhəddin Əkbər isə çıxışında bildirib ki, müzakirə olunan məsələ çox genişdir: “Azərbaycandakı vəziyyəti düzgün qiymətləndirmək üçün ölkənin hansı mühitdə olduğunu bilməliyik. Azərbaycan kiçilən dünyanın kiçik bir parçasıdır. Dünyadakı proseslər təsir edir. Başlıca prosesləri nəzərə alıb vəziyyəti qiymətləndirməliyik”. O, dünyada baş verən vacib, önəmli prosesləri sadalayaraq onların arasında yumşaq gücün, iqtisadi gücün önəminin artmasını xüsusi vurğulayıb. S.Əkbər bildirib ki, dünyadakı vacib proseslərin fonunda ölkədə demokratiya və insan azadlıqları sahəsində vəziyyət getdikcə pisləşir. Siyasi müxalifət faktiki olaraq oyundan kənarlaşdırılıb. S.Əkbər siyasi hakimiyyətə vəziyyətdən çıxmaq üçün təkliflər də verib. Siyasi məhbusların azadlığa buraxılması təkliflər arasındadır.

 VHP sədri Sabir Rüstəmxanlı isə qeyd edib ki, bu ür müzakirələr vacibdir: “Azərbaycanın vəziyyəti çox ağırdır. Çünki Azərbaycanın sükanı öz əlində deyil”. Onun sözlərinə görə, dünya reallıqda üçüncü dünya müharibəsinə hazırlaşmaqdadır. O, həmçinin, ölkənin təhlükəsizliyindən narahatlığını vurğulayıb.

 AXP sədri Pənah Hüseyn isə qeyd edib ki, sanki bütöv toplumların, dövlətlərin, xalqların, kütlələrin, pul vahidlərinin belə ağlını itirdiyi dövrdə yaşayırıq:. Onun sözlərinə görə, bir müddət əvvəl baş tutan iqtidar-müxalifət dialoqundan sonra cəmiyyətin müəyyən kəsimində ümid qığılcımı yaransa da, sonuc narahatedicidir: “Amma müəyyənliyin olmaması, yeni bir situasiyanın olmaması cəmiyyətə fayda vermir, əksinə, məyusluğu bir qədər də artırmağa xidmət etməyə başlayır”.

 Onun sözlərinə görə, tədbirə Milli Düşüncə Mərkəzinin rəhbəri İsa Qəmbəri, Müsavat başqanı Arif Hacılını, Milli Şuranın sədri Cəmil Həsənlini, AXCP sədri Əli Kərimlini, o cümlədən bir neçə deputatı dəvət etsə də, onlar iştirak etmirlər: “Bu adamların bu gün sözlərinin eşidilməsinə ehtiyac var”.

 P.Hüseyn vəziyyətdən çıxış yolu kimi bir araya gəlməyi təklif edib: “Götür-qoy edib, bir araya gəlib milli birlik formasında bu məsələlərdən çıxmaq olar. Bu da bu il gözlənilən seçkilərdir. Bizim ciddi koalisiyaya ehtiyacımız var. Hətta hakimiyyətlə də seçki məsələsində konsensusa getmək lazımdır”.

 Ekspert Ərəstun Oruclu isə qeyd edib ki, Azərbaycanda demokratik keçid qeyri-mümkündür: “Bunun üçün nə siyasi, nə iqtisadi, nə hüquqi baza var, nə zəruri institutlar var, nə seçki prosesi var. Heç bir amil yoxdur. Getdikcə də bu amillərin sayı artır. Siyasi fəaliyyət, demokratik keçid üçün bütün şərtlər aradan qaldırılıb. Biz nəyə baxıb optimist oluruq?”. Onun sözlərinə görə, son iqtidar-müxalifət dialoqu vəziyyəti düzəltməyə hesablanmamışdı: “Bu, imitasiya idi, aldatmadır. Eyni ilə vətəndaş cəmiyyəti ilə də belə dialoq təşkil olunmuşdu”.

Tədbirdə çıxış edən digər siyasilər də mövcud durumun yaxşı olmadığını vurğulayaraq hakimiyyəti çıxış yolu tapmağa çağırıblar.

    http://musavat.com/                    Röya RƏFİYEVA