Paylaşılma tarixi: Mar 24, 2015 5:49:23 PM
Kabulda qadınlar qaragüruh tərəfindən “yanlış ittihamla” öldürüldüyü düşünülən qadının cənazəsini əfqan dəfn adətlərinin xilafına olaraq özləri qaldırıblar.
Fərxundə adlı qadının dəfn mərasiminə qoşulan yüzlərlə insan bu qətli törədənlərin cəzalandırılmasını tələb edib.
Fərxundə Quranı yandırmaqda günahlandırılsa da, rəsmi istintaq bunun belə olmadığını üzə çıxarıb.
Bu qadının üzərinə basqın, habelə polisin zorakılığa müdaxilədən çəkinməsi ciddi tənqid olunur.
Əfqanıstan prezidenti Əşrəf Qani qətlin araşdırılmasına göstəriş verib.
Mobil telefonlarla çəkilmiş bu hadisənin videosu sosial şəbəkədə geniş yayılıb.
Əsasən kişilərdən ibarət qaragüruh qadının üstünə dəyənəklərlə düşüb və onu daş-qalaq edib. Qadın öldürüldükdən sonra yandırılarkən, məlumatlara görə, polis bir kənarda hərəkətsiz dayanıbmış.
Şahidlər deyirlər ki, izdiham qadını Quranı yandırmaqda ittiham edirmiş.
Şahdu-Şəmşayra məsçidinin və pirinin qarşısında baş vermiş bu qətl Əfqanıstanda bu qəbildən ilk hadisə sayılır.
Bazar günü keçirilən dəfn mərasimində qadınlar adətə görə kişilərin üstünə düşən işi özləri görərək cənazəni çiyinlərində qəbristanlığa aparıblar.
Daxili İşlər Nazirliyindən bu işi aparan müstəntiq deyib ki, qadının Quranı yandırdığını göstərən dəlillər yoxdur.
“Fərxundə tamamilə günahsız olub – general Məhəmməd Zahir jurnalistlərə deyib.
O bildirib ki, 8-i polis olmaqla 13 nəfər həbs edilib.
Qadının ruhi xəstə olduğu barədə bundan əvvəl yayılmış şaiyələri onun qohumları və qonşuları təkzib ediblər.
Fərxundənin qardaşı Reuters agentliyinə deyib ki, onun bacısı din müəllimi olmaq üçün təhsil alırmış. O izah edib ki, atası ailənin qalan üzvlərini müdafiə etmək üçün qızının ruhi xəstə olduğunu uydurub.
Ailənin bir qonşusu da Associated Press agentliyinə qadının heç bir ruhi problemi olmadığını və müəllimlik təhsili aldığını bildirib.
ABŞ əfqan qadınların sosial çəkisini və təhsilini artırmağa hesablanmış layihələrə milyonlarla dollar vəsait xərcləyib.
Buna baxmayaraq, əfqan qadınlar hələ də ölkənin əksər hissələrində diskriminasiyaya məruz qalırlar və onlara edilən basqınlar üçün çox vaxt heç kim cəzalandırılmır.
http://www.bbc.co.uk/