Paylaşılma tarixi: Oct 19, 2015 4:47:43 PM
Hörmətli Moderator.az saytı, sizə bir daha 40 ailə adından əvvəlcədən öz təşəkkürümüzü bildiririk.
3 gün öncə Moderator.az saytında “Şəmkirli sahibkarın İlham Əliyevə şok müraciəti” və 2 gün öncə o yazının davamı olaraq “Bazar günü xiyara görə Bakı - Qazax yolu bağlanacaq” başlıqlı yazı getmişdi. Təəssüflər olsun ki, hələlik "Azəriqaz" İB - nin sədri Əkbər Hacıyevə təsir göstərmək mümkün olmayıb. Həmin yazıların davamı olaraq bu yazını da ictimailəşdirib, Prezidentə ünvanlamağınızı xahiş edirik.
"Azəriqaz" İB-nin sədri Əkbər Hacıyev Azərbaycan Respublikası Prezidenti İlham Əliyev cənablarının sərəncamlarına, tapşırıq və tövsiyyələrinə məhəl qoymur, öz şəxsi maraqları üçün, öz bildiyi kimi işləyir.
Belə ki, ölkə başçısı bütün müşavirələrdə olduğu kimi sonuncu müşavirədə də çox ciddi şəkildə xəbərdarlıq etdi ki, sahibkarlara yersiz müdaxilə edən məmurlar çox ciddi şəkildə cəzalandırılacaq.
Təəssüflər olsun ki, "Azəriqaz" İB-nin sədri Əkbər Hacıyev bu xəbərdarlıqdan heç bir nəticə çıxarmamış, Şəmkir rayonu Qılıncbəyli kəndində fəaliyyət göstərən sahibkar Rüstəmov Kəramət Şəmməd oğlunun 4 hektar istixanasına gedən qaz xəttini soyuqlar düşəndə, məhsulun (xiyar) yetişdiyi bir vaxtda dayandırılması haqqında göstəriş vermişdir və qazın verilməsi dayandırılmışdır.
Qazın bərpa olunması üçün aidiyyəti dövlət qurumlarına dəfələrlə təcili teleqramalar vasitəsi ilə məlumatlar verilmişdir ki, məhsulumuz batır, kömək edin. Təəssüflər olsun ki, Əkbər Hacıyevə heç kəs təsir göstərə bilməyib.
Sahibkar 5 ildir istixanada qazdan istifadə edir. Bütün texniki göstərişlərə əməl etməklə, sənədləri də qanunvericiliyə uyğun şəkildə qaydasındadır. “Texniki-şərt” verilib. 6 dövlət qurumu razılaşdırılmış şəkildə öz imza və möhürləri ilə “Texniki şərti” təsdiqləmişlər.
Sahibkar fəaliyyət göstərdiyi 5-il ərzində qaz sərfiyatına görə ödədiyi vəsaitdən başqa hər il illik "Azəriqaz"ın “HAQQINI” da ödəyib.
Bu il isə sahibkarın istixanada yetişdirilən xiyar məhsulu pula getmədiyi üçün özünün maddi durumu da yaxşı deyil. Xiyar məhsulunu yetişdirmək üçün “ParaBank”-dan 150.000 min manat kredit götürüb. Maddi durumu pis olduğu üçün, bu səbəbdən Əkbər Hacıyevin “ HAQQINI” ödəyə bilməyib.
Nəticədə isə Əkbər Hacıyev bilərəkdən, qərəzli şəkildə, ilin bu mövsümündə, soyuqlar düşəndə, xiyarın məhsul verən vaxtında qəflətən, xəbərdarlıqsız qazın verilişini dayandırıb.
Bu haqsızlıqla bağlı sahibkar "Azəriqaz" İB-də olub, öz etirazını bildirib, heç olmasa məhsul yığımının sonuna kimi qazın bərpa olunmasını xahiş edib. Onları başa salmağa çalışıb ki, lazımı qədər istilik olmadığı üçün məhsuldarlıq aşağı düşür və məhsul batır. Amma onu başa düşən olmayıb.
"Azəriqaz"dan sahibkara bildiriblər ki, biz sizə heç cür kömək edə bilmərik. Sizə qaz verilişinin dayandırılmasını bir başa Əkbər Hacıyev özü göstəriş verib.
Sahibkar "Azəriqaz" İB-nin sədri Əkbər Hacıyevə müraciət edib. Hansı səbəbdən ilin bu mövsümündə, soyuqlar düşəndə, xiyar məhsul verəndə qaz xətti açılıb, əgər hər hansı bir nöqsan, çatışmazlıq var idisə nə üçün bizə nə yazılı, nə də ki, şifahi xəbərdarlıq olunmayıb?
Sahibkar məhsulunun batmaq üzrə olduğunu, qaz verilişi bərpa olunmazsa prezident İ.Əliyev cənablarına şikayət edəcəyini bildirib.
Bundan bərk əsəbiləşən Əkbər Hacıyev hündür səslə bəyan edib ki, get hara, kimə istəyirsən şikayət et. Neçə ki, mən Azəriqaz İB-nin sədri postundayam sizə qaz verilməyəcək.
Sahibkara divan tutan, DÖVLƏTDƏN, HAKİMİYƏTDƏN, PREZİDENTDƏN qorxmayan Əkbər Hacıyev öz əməlləri ilə sahibkarı, onun işçilərini,qohum-əqrabalarını, böyük bir kütləni dövlətdən, hakimiyətdən, Prezidentdən narazı olmağa sürükləyir.
Beləliklə də haqsızlıq, məmur özbaşnalığı, rüşvət tələb etmə vətəndaşları hakimiyətdən narazı salır. Şəmkirli sahibkara edilən haqqsızlıq da bunun əyani sübutudur.
Sahibkarın şikayəti ilə bağlı bir çox nüfuzlu şəxs də qazın bərpa olunması üçün Əkbər Hacıyevdən xahiş edib ki, xırda bir məsələni həll etsin, vətəndaşları aksiyaya çıxmağa vadar etməsin, bu narazılığı dövlət səviyəsinə çatdırmasın.
Mövcud durumla bağlı bütün dövlət qurumlarına şikayət etmiş sahibkar, heç bir reaksiya verilmədiyi üçün "Azəriqaz" İB-nin sədri Əkbər Hacıyevə qarşı 18.10.2015-ci il tarixdə BAKI-QAZAX avtomobil yolunda müvəqqəti olaraq avtomobillərin hərəkətini bağlamaq, ETİRAZ AKSİYASI keçirmək qərarına gəlir.
Bu haqqda saytlarda məlumatlar gedir. Xarici və yerli kütləvi informasiya vasitələri dəvət olunur. KİV nümayəndələri aksiyanın yeri və vaxtı barədə məlumatlandırılır.
Aksiyaya bir gün qalmış söz sahibləri, ağsaqqallar sahibkara bu işin sülh yolu ilə həllinə çalışacaq və qazın bərpa olunmasına nail olacaqlarını bildirirlər.
Sahibkar ağsaqqalın sözü ilə etiraz aksiyasını təxirə salır. Məsələnin həllinə çalışdıqları üçün sahibkara dəstək olan həmin ağsaqqallara dərin təşəkkürlərini bildirirlər.
Haqqlı olaraq bu qədər şikayət olundu, dövlət qurumlarının işə qarışması da ONA təsir etmədi, Əkbər Hacıyev sözünün üstündə duraraq inad edir ki, həmin istixanaya qaz verməyəcək.
Bütün bu olanlardan sonra tək bir çıxış yolu qalır. Qazı kəsilən, müflis olmaq üzrə olan sahibkarın istixanasına qaz verilişinin bərpa olunması üçün Azərbaycan Respublikasının Prezidenti İlham Əliyev cənablarının sərt və təxirəsalınmaz qərarı ilə, vətəndaşları öz əməlləri ilə üsyana təşviq edən harınlamış məmur Əkbər Hacıyevı vəzifədən uzaqlaşdırmaqdır.
Əkbər Hacıyev sahibkara bildirmişdi ki, neçə ki, mən burdayam, sənə qaz verməyəcəyəm.
Sahibkarın indiki durumu çox kritikdir. Belə ki, istiliyim olmaması ucbatından son 3 gün ərzində 70.000 min manat zərər edib. Daha 3 gün də qaz verilməzsə sahibkara heç bir vaxt qaz lazım olmayacaq. Çünki 4 hektar istixanada yetişdirdiyi xiyar üçün 200.000 min manat sərmayə qoymuşdu. Qoyulmuş vəsaitin əsas hissəsi "ParaBank"dan götürülmüş 150.000 min manat kredit hesabına idi. Sahibkar Əkbər Hacıyevin günahı ucbatından müflis olur, 40 ailə işziz qalır.