Paylaşılma tarixi: Apr 27, 2015 6:16:52 PM
"Bu, hakimiyyətin xarici siyasətinin tam şəkildə iflasa uğradığının göstəricisidir"
“Rossiya 1” kanalında nümayiş olunan “Prezident” filmində Rusiya dövlət başçısı Vladimir Putinin açıqlamasına Azərbaycan və ABŞ tərəfdən heç bir reaksiya yoxdur.
V.Putin 1999-cu ildə Şimali Qafqazda terrorun Rusiyanın məhvin astanasına gətirib çıxardığını iddia edib. Rusiya prezidenti bildirib ki, o, beynəlxalq terrorçuların ələ keçirilən yazışmalarında ciddi faktlarla qarşılaşıb: "Orda yazırdılar: “İndi unikal tarixi hadisədir. Bizim Qafqazı Rusiyadan ayırmaq üçün imkanlarımız var". Bir gün xüsusi xidmət orqanları Şimali Qafqaz terrorçuları ilə ABŞ-ın Azərbaycandakı xüsusi xidmət orqanlarının birbaşa əlaqəsi barədə məlumat verib.
Orada real olaraq hətta terrorçulara nəqliyyatla da kömək edirdilər. Bu barədə mən ABŞ prezidentinə məlumat verdim. O isə həmin şəxsləri pis şəkildə təhqir edərək, məsələni həll edəcəyini mənə söz verdi”.
Prezidentin söylədiklərini Meydan TV-yə şərh edən Şərq-Qərb Araşdırmalar Mərkəzinin rəhbəri, politoloq Ərəstun Oruclu bildirdi ki, Putin keçmişdə uğursuz xəfiyyəçi olsa da, xəfiyyəçilərin harada fəaliyyət göstərməsinin bir o qədər də önəmli olmadığını bilməlidir: "Əsas məsələ bu mesajın ictimailəşməsidir. Söhbət MKİ-dən gedirsə, Putin Rusiya ərazisində də qurumun şəbəkəsinin olduğunu yaxşı bilir".
Politoloq hesab edir ki, Putinin Azərbaycanın adını hallandırmaqda məqsədi rəsmi Bakıya təzyiq etmək istəyidir: "Bu, rəsmi Bakının davranışlarında da özünü büruzə verir. Son zamanlar Prezident Administrasiyasından nəzarətdə olan mediaya Putinin əleyhinə tənqid yazmaq qadağan olunub. Maraqlıdır ki, rəsmi mətbuatda, konkret "Azərbaycan" qəzetində dünyanın fövqəldövləti ABŞ haqqında təhqir və ən ağılasızmaz böhtanlar yazırlar. Amma "erməni soyqırımı" ilə bağlı düzənlənən mərasimə qatılan və Azərbaycanı terrorizmdə ittiham edən Putin barədə adi tənqid yazmağa qadağa qoyulur. Bu, hakimiyyətin xarici siyasətinin tam şəkildə iflasa uğradığının göstəricisidir. Amerikanın siyasi davranışından sezilir ki, ABŞ Azərbaycan hakimiyyətini Rusiya ilə baş-başa buraxıb. Bakı Vaşinqtonu daim onunla şantaj edirdi ki, insan haqları, ədalətli seçkiləri ciddi şəkildə qabartsanız, üzümüzü Rusiyaya tərəf yönəldəcəyik. Görünür, ABŞ bu məsələlərdən yoruldu və "elə üzünüz o tərəfədir, çevirməyə ehtiyac yoxdur" - mesajını verdi".
Ə.Oruclu hakimiyyətin çaşqın durumda olduğunu və təhlükənin də şimaldan gəldiyini bildiyini dedi: "İndiyə qədər Ramiz Mehdiyevin və digərlərinin Vaşinqton barədə yazdığı yalnız yalan və böhtan olmayıb, həm də siyasi riyakarlıq olub. Çünki hakimiyyət onlara əsas təhlükənin Rusiyadan olduğunu bilir. Sadəcə, Rusiya amilini siyasi alverə çevirmişdilər. Ona görə ABŞ "gedin, alverinizi edin" mesajını verdi. Bu alverin qiymətinin çox baha olduğunu hakimiyyətdəkilər çox yaxşı bilir".
"Son 200 illik tariximizdə Rusiya yalnız neqativ rol oynayıb, Ermənistan adlı dövləti Moskva yaradıb, torpaqlarımızı da onlar verib ermənilərə, Qarabağ probleminin də əsasını bu dövlət qoyub, tariximizi Moskvadakılar yazıb, əlifbamızı da 4 dəfə onlar dəyişib. Bütün bunları bilmək üçün yenidən 200 il zamanmı lazımdır? Birdəfəlik bilməliyik ki, Rusiya dövlətçiliyimizə çox ciddi təhdiddir. Müstəqilliyimizin yeganə təminatçısı Avroatlantik birlikdir, Türkiyədir, İsraildir, amma Rusiya deyil. Əgər Gömrük İttifaqı kimi layihəsi varsa, hansı müstəqillikdən söhbət gedir. Hesab edirəm ki, Putinin həmin fikirləri primitiv şantajdır. Ancaq bu primitiv şahtaj hakimiyyətə işləyir. Baxın, Amerika dövlətinin yaradıcılarını küçə ritorikası ilə tənqid edən "Azərbaycan" Rusiya haqqında bir cümlə də yaza bilmir",-deyə politoloq fikrini bitirib.
http://www.meydan.tv/