Politoloq: "İsrailin etirazlarının müharibə müstəvisinə keçəcəyini düşünmürəm"

Paylaşılma tarixi: Apr 03, 2015 4:49:26 PM

"Bütün baş verənlərin uğurla başa çatması əsas olaraq İran, ABŞ və Avropa ölkələrindən asılıdır""İsrail bölgədə böyük bir dövlətlə müharibəni yalnız o halda edə bilərdi ki, onun arxasında ABŞ kimi böyük dövlət dayansın. ABŞ isə artıq buna getməyəcək, çünki onun siyasəti konkret olaraq İranla münasibətləri nizamlamaqdır və hətta bu məsələdə İsrailin etirazları da nəzərə alınmadı". Bu sözləri Ölkə.az-a politoloq Ərəstun Oruclu İsrailin İranla Qərb arasındakı nüvə razılaşmasına qarşı çıxmasını şərh edərkən deyib."Nəinki İsrailin hətta ABŞ-ın daxilində respublikaçıların buna kəskin şəkildə müqavimət göstərməsi, senatda müxtəlif əks qərarlar qəbul etmək cəhdi, İranın ali dini rəhbərinə ünvanlanan məktub və.s baş verən hadisələr buna təsir göstərmədi. Ona görə də, bu ABŞ xarici siyasətinin strateji xətlərindən biridir.

 İsrailin etirazlarının müharibə müstəvisinə keçəcəyini düşünmürəm. Əgər elə bir şey olarsa, ABŞ-ın İsrailə heç bir dəstəyi olmayacaq.

 Təbii ki, İsrail öz etirazını bildirir, çalışır ki, ABŞ-ın siyasətinə təsir göstərsin. Amma artıq proses gedir. Düşünürəm ki, bütün baş verənlərin uğurla başa çatması əsas olaraq İran, ABŞ və Avropa ölkələrindən asılıdır".

 Xatırladaq ki, İsrail baş naziri Benyamin Netanyahu ABŞ prezidenti Barak Obama ilə telefon danışığında İranla “Altılar” qrupu (BMT Təhlükəsizlik Şurasının beş daimi üzvü+Almaniya) arasında aprelin 2-də axşam İsveçrənin Lozanna şəhərində aylarla sürən üzücü danışıqlardan sonra əldə edilmiş nüvə razılaşmasını kəskin pisləmişdir.

Ölkə.Az