İranın üzü çöndü, Qərblə münasibətlər yenidən pisləşdi

Paylaşılma tarixi: Apr 10, 2015 5:0:21 PM

Ruhani: “Heç vaxt öz əleyhimizə olan bir anlaşmaya imza atmayacağıq”; ABŞ dövlət katibi sərt danışdı ABŞ İranın Yəməndə hərbi münaqişəyə müdaxilə etməsinə icazə verməyəcək. Musavat.com-un “Reuters”ə istinadən məlumatına görə, bu sözləri ABŞ dövlət katibi Con Kerri deyib. Onun sözlərinə görə, prezident Mansur Hadini ölkədən qovan husi silahlılarına İrandan gələn dəstək ABŞ-a yaxşı məlumdur. “Biz münaqişə axtarmırıq. Lakin müttəfiqlərimizi də tək buraxmayacağıq. Biz İranın mümkün fəaliyyətindən özünə təhlükə hiss edənlərə dəstəyimizi davam edəcəyik” deyə, Kerri telemüsahibəsində bildirib. Dövlət katibi bildirib ki, ABŞ İran tərəfdən özünə təhlükə hiss edən Yaxın Şərq ölkələrinə dəstək verəcək. Qeyd edək ki, İran Səudiyyə Ərəbistanı və müttəfiq dövlətlərin husilərə qarşı hərbi əməliyyatların keçirildiyi Yəməndə hərbi varlığını qorumaq üçün hərbi gəmilərini bölgəyə göndərib. İran Hərbi Dəniz Qüvvələrinin komandiri, kontr-admiral Həbibullah Səyyari bildirib ki, Alborz dağıdıcı gəmisi və Buşehr köməkçi gəmisi Ədən körfəzinə göndərilib. Həbibullah Səyyari gəmilərin hansı məqsədlə göndərildiyini də açıqlayıb: “Hərbi gəmilər İran gəmiçiliyinin təhlükəsizliyini təmin etmək və açıq dənizdə İranın maraqlarının qorunması missiyası üçün göndərilib”. Səudiyyə Ərəbistanının Yəməni bombalamasından sonra İranla bu ölkənin münasibətləri daha da gərginləşib. İş o yerə çatıb ki, Səudiyyə Ərəbistanı İsfahandan Ciddə şəhərinə uçan İran Hava Yollarına aid təyyarənin enişinə icazə verməyib. Bu barədə İran mətbuatı məlumat verib. “İLNA” xəbər agentliyinin yazdığına görə, təyyarədə ümrə ziyarətinə gedən 290 zəvvar olub. Səudiyyə Ərəbistanı təyyarənin enməsinə icazə vermədiyinə səbəb kimi təyyarənin eniş icazəsi olmadığını göstərib. İran Hava Yollarının rəsmiləri isə eniş icazəsinin olduğunu bildirib. İran da nüvə proqramı ilə bağlı Lozanna razılaşmasından sonra dünyanın sevinməsinin tez olduğuna işarə edib . “Sanksiyalar aradan qaldırılmasa, İran ”altılıq" ölkələri ilə nüvə proqramına dair sazişi imzalamayacaq. İran heç vaxt öz əleyhinə olacaq bir anlaşmaya imza atmaz". Newsru.com-un məlumatına görə, Milli Atom Texnologiyası günü münasibətilə keçirilən tədbirdə İran prezidenti Həsən Ruhani belə bir açıqlama ilə çıxış edib. Həsən Ruhani deyib ki, nüvə proqramından tam imtina edilməyib. O, həmçinin danışıqlara qatılan bütün iranlıların böyük səy sərf etdiyini bildirərək onlara minnətdar olduqlarını vurğulayıb. Ruhani nüvə müqaviləsini dünya ilə ortaq işlər həyata keçirmək üçün ilk addım olaraq gördüklərini vurğulayıb: “Bu razılaşma həm Qərb, həm də bölgə ölkələri baxımından faydalıdır. Region ölkələrinə səslənirik, gəlin qardaşlığımızı yenidən təsis edək”. Ruhani deyib ki, danışıqlarda qalib tərəf İrandır: “Barak Obama etiraf etdi ki, iranlıları sanksiya və hədələrlə qorxutmaq olmaz”. Qeyd edək ki, ötən həftə Lozannada İranla “altılıq” ölkələri arasında İranın nüvə sənayesinin dinc məqsədlərlə istifadəsinə dair razılaşma əldə olunub. Bu sazişə əsasən, İran nüvə silahı əldə etmək fikrindən daşınır, ancaq nüvə enerjisindən dinc məqsədlərlə istifadə etməsinə yol verilir. Bunun əvəzində İrana qarşı tətbiq edilən sanksiyalar aradan qaldırılmalıdır. ABŞ həmin sanksiyaların tədricən aradan qaldırılacağını bildirir. İran isə bütün sanksiyalara tezliklə son qoyulmasını tələb edir./birlik.az/ Xeberlent.az - See more at: http://xeberlent.az/index.php?do=xeber_inner&id=11231#sthash.wi3EL9X0.dpuf