Vəhhabilər Kəbəyə necə basqın etdi? - Araşdırma

Paylaşılma tarixi: Apr 23, 2015 12:42:1 PM

35 il bundan əvvəl müqəddəs Kəbə evinə bir qrup silahlı terrorçu hücum etdi Müqəddəs Kəbə evi 2 həftədən çox müddət ərzində işğal olundu və baş verən silahlı qarşıdurmalar zamanı yüzlərlə insan həlak oldu. Basqın çox qanlı şəkildə və həm də fransa anti-terror hərbi qüvvələrinin iştirakı ilə dayandırıldı. Bəzi mənbələr hərbi əməliyyatlar zamanı Mərkəzi Kəşfiyyat İdarəsinin (CİA) və MOSSAD-ın iştirak etdiyini qeyd edir. Bu barədə apardığım araşdırma zamanı gördüm ki, hadisə barədə bu günə qədər Səudiyyə rəhbərliyi heç bir rəsmi açıqlama verməyib. İnternet resurslarında olan məlumatlar isə yarımçıq və tam olmadığından bu barədə olan araşdırmamı uzun zaman idi ki, tamamlaya bilmirdim. Nəhayət araşdırma yazımı tamamladım və sizlərə təqdim edirəm: 1979-сu il 20 noyabr səhər saatlarında sayı yüzdən çox olan silahlı qrup Kəbə evinə daxil oldu. Kəbə evində bir anda “Allahu Əkbər” və silah səsləri eşidildi. Silahlılar Beytül-Həramı mühafizə edən əsgərləri öldürdü və səs sistemini ələ keçirərək çıxış etməyə başladılar.

 Silahlı üsyançıların liderləri çıxışlarında Səudiyyə rejiminin şəriət yolundan döndüyünü və gözlənilən “Mehdi”nin zühur etdiyini açıqladılar. Silahlı üsyançıların liderinin adı Cuheyman ibn Məhəmməd ibn Seyf Əl-Quteybi idi. O, öz yaxın qohumu olan Kahtani adlı şəxsi “Mehdi” olaraq adlandırdı və üsyançıların ona beyət etməsini bildirdi. Yüzlərlə silahlı şəxs birdən-birə yalançı “Mehdiyə” beyət etdi. Basqının hazırlıqları əvvəlcədən hazırlanmışdı. Kəbənin altında yerləşən qədim tunellərə bir neçə ay ərzində silah-sursat və bir müddət istifadə olunacaq yemək ehtiyatı yerləşdirilmişdi. Tunellərin şəhərin çıxışına gedən qolları, Əcyad qalasına gedən çıxışı tutulmuşdu. Hətta Əbu Qeys dağı da üsyançıların nəzarətinə keçmişdi. Bir sözlə təhlükəsizlik qüvvələrinin Kəbəyə giriş imkanları tamamilə məhdudlaşdırılmışdı. Minarələrə çıxan üsyançılar Səudiyyə əsgərlərinin Beytül-Həramın ətrafını necə mühasirəyə aldığını rahat şəkildə görə bilirdilər.

Baş verənlərin qarşısını ala bilməyəcəyini anlayan Səudiyyə rejimi Pakistandan kömək istədi. Lakin əraziyə yerləşdirilən Pakistan əsgərləri də heç bir şey edə bilmədilər. Bundan sonra Fransadan anti-terror hərbi qüvvələrindən kömək istənildi. Lakin bir problem var idi. Müsəlman olmayanların, yəni “qeyri-müslimlər”in Beytül-Hərama daxil olması haram və qadağan idi. Səudiyyə bunun üçün Məkkə müftisi İbn Baza müraciət etdi. İbn Baz müsəlman olmayanların kəlmeyi şəhadet dedikdən sonra Beytül-Hərama daxil ola biləcəyi barədə fətva verdi.

 Artıq hər şey hazır idi. Lakin dünya hələ də Məkkədə nə baş verdiyindən tam olaraq xəbərsiz idi.

 Qərbə bağlı media hadisənin iranlı yaraqlılar tərəfindən törədildiyini iddia edirdi. Onlar bu iddianı ona görə irəli sürürdülər ki, 1979-cu ildə İslam İnqilabı baş vermişdi. Bu əsasla da güya İran Kəbəni işğal etmək istəyirdi.

 Mətbuatda gedən xəbərlər çox keçməmiş İmam Xomeyni (r.ə) tərəfindən təkzib olundu. İmam Xomeyni (r.ə) radio vasitəsilə etdiyi açıqlamada baş verənləri ABŞ və işğalçı İsrail rejiminin qurduğu oyun olaraq xarakterizə etdi.

 İslam İnqilabının banisi İmam Xomeyni (r.ə) tərəfindən edilən açıqlamadan sonra, bir çox müsəlman ölkələrində yerləşən ABŞ və işğalçı İsrail səfirlikləri qarşısında etiraz aksiyası keçirildi.

 Etiraz aksiyalarının baş verdiyi zaman bütün diqqətlər Kəbə evinə yönəlmişdi. 2 həftədən sonra Səudiyyə rejimi hərbi əməliyyatların başlaması üçün əmr verdi. İlk öncə Kəbə evinin altında olan tunellərə böyük su şırnaqları ilə tonlarla su dolduruldu. Bundan sonra suya elektrik verildi. Nəticədə Kəbə evinin ətrafında çox sayda meyit su üzündə toplanmağa başladı. Amma hərbi əməliyyatlar bitməmişdi. Fransa anti-terror hərbi qüvvələri vertalyotlar vasitəsilə Kəbə evinə hücum etdi və üsyan qanlı şəkildə yatırıldı. Onu da qeyd etmək istəyirəm ki, Beytül-Həramda qan tökülməsi haram buyurulsa da, bu fətva yenidən pozuldu. Üsyançıların lideri Cuheyman ibn Məhəmməd ibn Seyf Əl-Quteybi sağ ələ keçirildi. Onun və digər sağ ələ keçirilən üsyançıların ilk öncə qolları kəsildi. Bundan sonra ölməyən üsyançıların başı kəsilərək, Səudiyyə Ərəbistanının müxtəlif şəhərlərinə göndərildi. Cəsədlər böyük xalq kütlələri qarşısında nümayiş olundu. Bunun səbəbi isə gələcəkdə kim yenidən belə bir işə əl atmaq istəsə, sonlarının belə olacaqları barədə əvvəlcədən xəbərdarlıq idi.

Lakin qaranlıq olan bir məsələ var. Üsyançılar necə oldu ki, bir neçə ay ərzində Beytül-Həramın altında yerləşən tunellərə o qədər silahı və ehtiyat ərzağı yığa bildi? Kəbəyə basqın olan zaman müqəddəs məkanda təmir işləri aparılırdı. Təmir işlərini aparan şirkət dünyada hamının tanıdığı o zaman tikinti işləri ilə məşğul olan Usamə ben Ladenin ailəsi idi. Hadisələr bitdikdən sonra tikinti şirkətinin rəsmisi və Usamə ben Ladenin ögey qardaşı olan Mahrous ben Laden həbs olundu.

  Üsyançılar arasında Misirlilər və Səudiyyəli ərəblərdən başqa, ABŞ və Kanada vətəndaşları olan müsəlmanlar da var idi.

 Rus yazıçı Yaroslav Trofimov, “Məkkə mühasirəsi” adlı kitabında qeyd edir ki, “Kəbə basqınında iştirak edən iki ABŞ vətəndaşından biri Beytül-Həramın altındakı tunellərdə Zəmzəm quyusu ətrafında şüşə qablardan “molotef kokteyli” hazırladı. Amma o şəxs ABŞ-ın Səudiyyə Ərəbistanında olan səfiri vasitəsilə öz ölkəsinə ekstradisiya edildi və ABŞ-da keçirilən məhkəmə proseslərindən sonra sərbəst buraxıldı.”

Rus yazıçısının dediklərini belə anlamaq olur ki, hadisənin baş verməsində ABŞ-ın hansısa marağı olub. Bəlkə də hadisəni İrandakı İslam İnqilabı ilə əlaqələndirmək istəyiblər. Bununla da inqilabın əsl mahiyyətini insanların gözündən salmaq istəyiblər. Əvvəldə də qeyd etdim ki, İmam Xomeyninin (r.ə) açıqlaması CİA-nın planlarını alt-üst etdi. Əksinə, o illərdə həm ABŞ və işğalçı İsrail, həm də qeyri-müsəlman olan Fransa əsgərlərinin Beytül-Hərama daxil olmasına fətva verən Səudiyyə müftiləri əleyhinə etiraz dalğaları başladı. Daha bir qanlı üsyan müvəffəq olmamış yatırıldı.

Lakin bu günə qədər Səudiyyə rəhbərliyi bu barədə heç bir rəsmi açıqlama verməyib.

İlkin Məmmədov

AzadXeber.az-ın baş redaktor əvəzi