“Haramı sona qədər rahat yeyən görməmişəm”

Paylaşılma tarixi: Feb 25, 2015 4:51:5 PM

"Əhalinin əsas hissəsi hələ bazar iqtisadiyyatının nə olduğunu bilmir" Tanınmış hüquqşünas Aslan İsmayılovun manatın devalvasiyasından sonra cəmiyyətdə yaranmış ajiotaj haqqında fikirlərini təqdim edir: "Neft pulları, bununla bağlı asan gəlir əldə etmək dövrü bitdi. Bundan sonra da hadisələrin necə cərəyan edəcəyi heç kimə bəlli deyil. Əksəriyyət bir ümidsizliyə qapılıb. Zənnimcə, ümidsizliyə qapılmaq yox, hamılıqla baş vermişlərdən nəticə çıxarmalıyıq. Vətəndaşlarına qul kimi baxan, neftin qiymətinin yüksək olması ilə bağlı ölkəyə daxil olan milyardları mənimsəyən, pulları havaya sovuran, düşmüş fürsəti dəyərləndirib gələcəyə istiqamətlənmiş heç bir iqtisadiyyat qurmayan hakimiyyətə münasibətim dəyişməyib və heç vaxt dəyişməyəcək. Bu tip insanlara münasibətimi həmişə bildirmişəm və bildirəcəm. Bir daha təkrar edirəm, bu yaşıma qədər haramı sona qədər rahat yeyən görməmişəm. Belələrinin sayı Bakı küçələrində şütüyən bahalı maşınlar qədər də çox deyil. Həmin maşınların böyük əksəriyyətini idarə edənlər, sabahını düşünməyən, 24-30 faizlə bankdan kredit götürüb, özünü bu yolla təsdiq etmək istəyən insanlardır. Hesab edirəm ki, əhalinin əsas hissəsi də hələ bazar iqtisadiyyatının nə olduğunu bilmir və hələ də sovet dünyagörüşü ilə yaşayır. Peşəmlə bağlı rastlaşdığım, banklardan kredit götürən insanlarla söhbətlərdən, anladığım bir şey olub ki, həmin insanlar pulu götürəndə onu necə qaytaracağını əsla düşünmürlər. Bunu düşünən insan illik 24-30 faizə, hələ ayrı-ayrı şəxslərdən aylıq 10-20 faizə kredit götürənləri demirəm, kredit götürməz. Vaxtı gələndə isə ödəmə yox, bundan necə yan keçmək yollarını axtarırlar. Dərhal bu istiqamətdə onlara yardım edəcək vəkillər, hakimlər tapılır və sonda bu cür insanlar yaxşı halda yaşadığı mənzilləri də itirirlər. Tikintidə işləyən fəhlə kreditlə maşın götürüb işə gedir. Bahalı telefon alan, bu telefonla saatlarla boş-boşuna çənə döyən, istirahətə gedən, dəbdəbəli toy, yas mərasimləri keçirənlərin də bir çoxu, “qonşudan geri qalma” prinsipi ilə hərəkət edib borca girirlər. İnsanlar nəhayət ki, öyrənməlidirlər ki, "yorğanına görə ayaq uzatmaq lazımdır". Bu yaxınlarda bir türk iş adamı mənə bildirdi ki, Türkiyədəki fəhlənin maaşı bizim fəhlələrin maaşına bərabərdir. Ancaq onların iş faydalılığı bizimkilərdən 2-3 dəfə çoxdur. Məhz buna görə son vaxtlar bir sıra xarici ölkələrdən Bakıya işçi qüvvəsi kimi fəhlələr gətirməyə başladılar, o cümlədən Avropa ölkələrindən. Azərbaycanlı fəhlə də, məmular kimi əməyinə görə işləmək istəmir. Bunu görmək üçün özüm Avropa ölkələrində fəhlələrin necə işləməsini seyr etmişəm. Bir alman fəhləsinin gördüyü işi heç 3 azərbaycanlı fəhlə görmək istəmir, hələ işin keyfiyyətini demirəm. Başa düşürəm ki, bu mövzudakı çox qısa yazım əksəriyyətin xoşuna gəlməyəcək. Ancaq bu reallıqdır və bununla hesablaşmağımız, nəticə çıxarmağımız lazımdır." - See more at: http://xalqxeber.az/kose/10889-harami-sona-qeder-rahat-yeyen-gormemishem.html#sthash.I2ETfd2F.dpuf

http://xalqxeber.az/