Zaqatalada dağıdıcı zəlzələ olub-olmayacağını deyə bilmərik - Seysmoloji Xidmət Mərkəzi

Paylaşılma tarixi: Jan 23, 2015 5:52:27 PM

“Zaqatalada yeraltı təkanlar tez-tez təkrarlanır. Ancaq bu əsas vermir deyək ki, bir neçə il əvvəl baş verən dağıdıcı zəlzələ yenidən təkrarlana bilər, ya yox. Çünki proqnoz vermək mümkün deyil. Sadəcə, seysmik şəraiti qiymətləndirərək, potensial ocaq zonasında gedən geodinamik dəyişiklikləri izləyirik. Zaqatalada daim zəlzələlər olub. Əksəriyyəti zəif təkanlar olduğundan bununla bağlı açıqlamalar vermirik, 3 baldan yuxarı zəlzələr barədə informasiya yayırıq”.

Bunu Modern.az-a açıqlamasında Respublika Seysmoloji Xidmət Mərkəzinin şöbə müdiri Tahir Məmmədli deyib.

O qeyd edib ki, ümumiyyətlə, Azərbaycanda gün ərzində çox sayda zəlzələ baş verir: “Bunlar heç bir əsas vermir söyləyək ki, orada güclü zəlzələ olacaq, yaxud olmayacaq.

Son bir neçə ayda zəif də olsa təkanların sayı artıb, aktivləşmə müşahidə edilir. Amma hər bir aktivləşmə güclü zəlzələyə gətirib çıxarmır. Aktivləşmə Xəzər dənizində, Şəki-Zaqatala, Şamaxı-İsmayıllı bölgəsində, Lənkəran, Talış bölgəsində, İranla sərhəd bölgələrində də müşahidə edilir”.

Sesmoloji Mərkəz rəsmisi Naxçıvanda qeydə alınan zəlzələlərlə bağlı isə deyib ki, Naxçıvan və ona bitişik Zəngəzur ərazisi seysmik cəhətdən aktiv zonalardır:

“Bölgə seysmik cəhətdən 9 ballıq seysmik təhlükəli zona kimi qeydə alınıb. İndiyə qədər Naxçıvanda zəlzələlər barədə az informasiya verilməsinin səbəbi orada bir seysmik stansiyanın fəaliyyət göstərməsi ilə bağlı idi. Hazırda Naxçıvanda 4 seysmik stansiya quraşdırılıb, ən zəif zəlzələri belə qeydə alır. Bunun sayəsində Naxçıvanın aktiv qırılma zonaları öyrənilib. Son dövlər ictimaiyyət arasında belə fikir yaranıb ki, zonada zəlzələlər artıb. Amma əslində bu, dediyim məsələ ilə bağlıdır. Əvvəllər zəlzələlər qeydə alınmadığına görə informasiyalar da az olurdu”.

Gülşən RAUFQIZI