Paylaşılma tarixi: Aug 12, 2015 5:3:45 PM
Azərbaycan prezidenti öz ampluasına xas olan olimpiya sükütunu pozaraq, qətlə yetirilmiş jurnalist Rasim Əliyevlə bağlı məsələni şəxsi nəzarətinə götürdü. İlham Əliyev cəmiyyətin nə istdəyini bilən siyasətçidir. Dövlət başçısı anladı ki, kimlərsə, vəhşicəsinə qətlə yetirilən jurnalistin qanını batırmaq istəyir.
Qətldə adı hallanan nüfuzlu idmançı öz adı ətrafında hallanan qalmaqallara son qoymaq üçün canfəşanlıq edirdi. Prosesdə ayrı-ayrı məmurların da adı hallanırdı. Mətbuat nümayəndələri özləri də çaşbaş idilər. İlk baxışdan, Rasim Əliyevin qanının batırılması istiqamətində hər bir addım atılmışdı. Lakin İ. Əliyevin işə qarışması düşünülmüş ssenarini darmadağın etdi. Prezident qətlə yetirilmiş jurnalistin qanının batmayacağına söz verdi və...futbolçu Cavid Hüseynov, daha 5 nəfər istintaqa cəlb edildi. Heç kəsə güzəşt olmadı. Prezident qanunun yanında olduğunu əməldə sübuta yetirdi. Jurnalistin qanını batırmaq istəyənlər ölkə başçısının göstərişindən sonra yerlərini və hədlərini bildilər.
Jurnalistin qətli ilə bağlı aparılan həbslər vətəndaşların dövlətə inamını bərpa etdi. Bu hadisə sübuta yetirdi ki, heç kəs kimsəsiz deyil və dövlət öz vətəndaşını sona qədər müdafiə edə bilir.
Baş verənlərdə həkim savadsızlığı, bəzi ağ xalatlı cəlladların insan taleyinə biganəliyi də qabarıq şəkildə özünü büruzə verdi. Bu amil prezidentin də diqqətini çəkdi. İslahatlar barədə konkret plana malik olan prezident bu hadisədən sonra prosesləri daha da gücləndirmək fikrində olduğunu nümayiş etdirdi.
Rasim Əliyevin qətlinin yaratdığı mənzərə ürəkaçan deyil. Bu hadisə göstərdi ki, prezident bütün komandanın yükünü öz çiyinlərində daşıyır. “Artıq yüklər” dövlət başçısına islahat paketində mane olur. Yeni, savadlı və işgüzar komandaya ehtiyac var. Prezidentin nəzərdə tutduğu islahatları həyata keçirmək üçün bu amil son dərəcə mühümdür. Dəyişikliyi zəruri edən daha bir ciddi səbəb həm də dünyanın yeni nizamıdır. İranın Qərblə anlaşması, Rusiya – Ukrayna savaşı və s. amillər Azərbaycan hakimiyyəti təkcə xarici siyasətdə deyil, daxildən də manevr imkanları qazandırmaqdadır.
Daha bir mühüm amil isə neftin qiymətinin düşməsinin yeni iqtisadi reformalar tələb etməsidir. Büdcə əvvəlki kimi neft pulu ilə dolub-daşmır və yaranmış vəziyyət yeni iqtisadi şərtlərlə işləməyi diktə edir. Prezident mesaj verir – nefti unudun və bununlada post-neft dövrünün başlandığını açıqlamış olur. Prinsip etibarilə, tamamilə yeni dövr başlanır və qarşıdakı mərhələdə cəmiyyətdə gərginliyin aradan qaldırılmasına çalışmaq lazım gəlir.
Yeni post-neft dövrünə keçid də ciddi kadr islahatlarını zəruri edir. Yeni kadrlar ölkənin istehsal qabiliyyətini artıqmaq gücündə olmağa məhkumdurlar. Kadr dəyişikliyinin bu düsturu kifayət qədər realdır. Çünki inzibati idarəetmə mexanizmi bir neçə güc mərkəzinin əlində cəmləşdikdə hər hansı dəyişikliyi reallaşdırmaq çətinləşir. Odur ki, struktur islahatlarının vacibliyi yaranır. Nəzarət isə şəxsən prezident tərəfindən həyata keçirilir.
Rasim Əliyevin qətlində yekun sözü özü deyən ölkə lideri iqtisadi islahatlar zamanı da qərarları şəxsən vermək gücündədir.
Avropa.info-nun ekspert qrupu