Paylaşılma tarixi: Nov 17, 2015 5:46:16 PM
«Azəri-Türk» Qadınlar Birliyinin sədrindən parlament seçkiləri və «MTN işi» ilə bağlı ilginc açıqlamalar
“Azəri-Türk” Qadınlar Birliyinin sədri, Dünya Azərbaycanlıları Konqresi sədrinin Türk Dünyası üzrə müşaviri Tənzilə Rüstəmxanlı moderator.az-a müsahibəsində maraqlı açıqlamalar verib. Seçkidən kənarda saxlanılmasına münasibət bildirən Tənzilə Rüstəmxanlı bunu özünə qarşı ədalətçizlik kimi qiymətləndirib:
“Hər yoldan ötən ipini qoparanı belə seçkiyə buraxdılar. Ancaq bilmədim ki, mən vətən xaini idimmi, Azərbaycana xəyanətmi etmişdim, nə baş vermişdi axı, uydurma, ağlasığmaz, parodiya olacaq bir bəhanələrə önümə əngəl qoyula. Buna çox qırıldım. Ancaq bu ölkəmdən qırılmaq demək deyil, mən yenə də işimdəyəm, öz yoluma davam edəcəyəm.
Mən bu dəfə ölkəm adına utandım ki, bizim seçkidə iştirakımız kimlərisə bu qədər narahat edir”.
Tənzilə Rüstəmxanlı Mərkəzi Seçki Komissiyasının (MSK) sədri Məzahir Pənahovu da tənqid atəşinə tutub: “Seçkidə mənə çox təsir edən məqamlardan biri də o oldu ki, Məzahir Pənahova acıdım. Mən onu bir alim kimi tanıyırdım və hörmət edirdim. Ancaq gördüm ki, insan özünü nə günlərə qoyarmış. Insanlar var ki, oturduğu kürsüyə hörmət gətirir. Bəzi insanların şəxsiyyəti, oturuşu, duruşu özünə hörmət gətirir. Mərkəzi Seçki Komissiyasının sədrinə heç kim olduğu üçün yazığım gəldi. Insan özünə hörmət edər, mən indiyədək bu qədər boş adam görməmişdim. Sən mənim önümdə sədd çəkə bilərsən, çünki sənə tapşırırlar, sən də yerinə yetirisən və mən buna bir söz demirəm, amma özünü məsxərəyə qoymadan, parodiya etmədən, həqiqiətə az da olsa uyğun gələn tutarlarla çıxış edərdin. Yoxsa ki, Molla Nəsrəddinin lətifələrinə oxşayan bəhanələr uydurmazdın. Onu görəndə hər zaman salam verirdim, ancaq indi düşünürəm ki, elə adamlara salam vermək belə günahdır”.
Tənzilə Rüstəmxanlı “MTN işi” ilə bağlı da maraqlı faktlar açıqlayıb: “Bəli, hazırda ölkədə MTN ətrafında çox ciddi məsələlər baş verir. Bütün mətbu orqanları qaldırıb baxın, görün hansısa mətbu orqanında o nazirliklə bağlı bir dənə də olsun yazıya rast gələ bilərsinizmi ki, oradakı qanunsuzluqlardan bəhs etsin. O nazir haqqında ümumiyyətlə mənfi söz tapa bilməzsiniz. Bir-iki yazıdan başqa və həmin yazılardan birini də mən yazmışdım. O vaxt ”Ideal” qəzetinin baş redaktoru onların adamı idi, baş kəsirdi, reketçilik edirdi. Özü də o vaxt etriaf elədi ki, məni onlar qaldırdı sizin üstünüzə. Onunla mübarizə aparıb çətin olsa belə həbs elətdirə bildim. Həmin adam ölkədə nazir qalmamışdı ki, şantac etməsin, məhkəmlər belə işi götürmək istəmirdilər ki, onsuz da onu buraxacaqlar. O nazirlikdə general var idi ki, həmin redaktor üçün hakimin kabinetinə gedərək, sən onu tuta bilməzsən deyirdi və həmin general indi də vəzifə başındadır. Axı bəzi adamlar buna cəsarət edib yazırdı, deyirdi. Amma heç kim dinləmirdi, ora nəzarət edən qurumlar başqa işlərlə məşğul idi. Görürsünüzmü bu mövzuda indi mən heç nə danışmıram. Türk mətbuatı belə mənə zəng vuraraq baş verənləri soruşurdu, ancaq heç nə danışmadım. Çünki yıxılana balta vuranlardan olmamışam, heç vaxt da olmayacağam. Indi də ona görə deyirəm ki, vaxtında onlara bu sözləri demişəm, yazmışam, müsahiblərimdə açıqlamışam, məktubla müraciət etmişəm, “sizin adınız hallanır bu məsələlərdə”, – deyə bildirmişəm. Ona görə indi danışmağa hamıdan çox haqqım var, amma danışmadım.
Azərbaycanda nazirliklər var ki, mətbuat onların üzərinə tankla, tüfənglə, topla gedir. Bəs nəyə görə MTN-nin üzərinə getmirdiniz?! Elə indi də bir neçə nazirliklər var, hansı ki, MTN-dən daha betər işlərlə məşğuldur, daha bərbad gündədir. Rəsmi reketçilik edən nazirliklər var, niyə getmirsiniz, niyə yazmırsınız?! Indi ən çox yazanlar, ən çox danışanlar da zamanında MTN-dən maliyyə alırdılar, indi hamıdan çox onların əleyhinə yazan bir sayt var. Adını belə çəkəndə ürəyim bulanır, çünki həmin adamlara vətən xaini kimi baxıram. Azərbaycana ciddi zərər vurublar, ermənilərin əlinə ciddi materiallar veriblər. Bir zamanlar MTN-dən pul alıb onu-bunu ləkələyənlər indi MTN-i hamıdan çox söyürlər. Düşündüm ki, bu çirkabın içindən uzaq durmaq lazımdır. Inşaallah proseslər daha geniş vüsət alacaq. Baş verənlər hələ heç nədir, orada qoluna birbaşa qandal vurulub həbsə aparılacaq generallar, şöbə müdirləri, idarə rəisləri var. Ölkəmizdə PKK-nın yandaşları, bəzi radikal qurumlar meydan sulayanda hara baxırdı MTN? Niyə araşdırmadılar ki, son illərdə Azərbaycandan IŞID-ə nə qədər adam qoşuldu, həmin adamların beyinlərini necə yuyub aparırlar öz sıralarına. MTN və ya başqa qurumlar bunlara baxmalı idi, Azərbaycanın iki-üç ziyalısını ləkələtdirməklə, işlərindən kənar məsələlərə məşğul olanda ölkənin təhlükəsizliyi təhlükəyə girir. Dövlətin təhlükəsizliyindən cavabdeh olan bir qurum bu vəziyyətdəmi olmalıdır?!”