Azərbaycanlı məmur Saakaşvilini əsəbləşdirdi

Paylaşılma tarixi: Aug 22, 2015 11:51:16 AM

Ukraynanın Odessa vilayətinin qubernatoru Mixail Saakaşvili azərbaycanlı məmurun işindən narazıdır.

Mixail Saakaşvili azərbaycanlı məmuru tənqid edib.

ANS PRESS-in məlumatına görə, Ukraynanın Odessa vilayətinin dövlət administrasiyasının rəhbəri Mixail Saakaşvili əslən azərbaycanlı Ukrayna Dövlət Fiskal Xidmətinin rəhbəri Roman Nəsirovu işində buraxdığı nöqsanlara görə sərt tənqid edib. Saakaşvili, hesab edir ki, Dövlət Fiskal Xidməti gömrükdə islahatların öhdəsindən gələ bilmir.

 Bunu Odessa qubernatoru İlyiçevsk dəniz ticarət limanı gömrüyünə işgüzar səfəri zamanı bəyan edib.

 “Roman Nəsirov adlı bir adam gəldi və kameralar qarşısında söz verdi ki, hər şeyi dəyişəcək. Amma heç nə dəyişməyib, hər şey olduğundan daha pisdir, hətta, Yanukoviçin vaxtından daha pis. O, bu insanlar üçün nəyi dəyişdi? Heç nəyi. Eybi yox, qoy, mən bu gömrükdə növbə çəkim, amma bu yuxulu, korrupsiyalaşmış, çürümüş strukturu insanlardan əl çəkməyə məcbur edəcəm”, - deyə Saakaşvili əlavə edib.

 Saakaşvilinin sözlərinə görə, onun İlyiçevsk dəniz ticarət limanı gömrüyünə səfərinin əsas məqsədi sahibkarların yüklərinin rəsmiləşdirilməsinin səbəbsiz ləngidilməsi ilə bağlı şikayətləri olub.

Roman Nəsirov - Dövlət Fiskal Xidmətinin rəhbəri

 Ukrayna Radasının deputatı və ölkənin Dövlət Fiskal Xidmətinin rəhbəri Roman Mikayıl oğlu Nəsirov 1979-cu il martın 3-də Kiev şəhərində anadan olub. Onun atası Mikayıl Nəsir oğlu Nəsirov 1976-ci ildə Azərbaycandan Ukraynaya gedib və ukraynalı xanımla ailə qurub. Bu nigahdan doğulan Roman uşaqlığından Ukraynada böyüyüb.

 O, 2000-ci ildə Çerniqov Dövlət iqtisadiyyat və İdarəetmə İnstitunu «maliyyə» ixtisası üzrə bitirib. Bundan əlavə, onun Şərqi London Universitetinin (University of East London) maliyyə və beynəlxalq menecment üzrə magistr dərəcəsi var.

Mgeo.ge