Deputat Azərbaycan tərəfə keçən erməni haqqında təklif verdi

Paylaşılma tarixi: Apr 03, 2015 5:3:11 PM

Bizimyol.info xəbər verir ki, Milli Məclisin iclasında deputat Zahid Oruc, bir müddət əvvəl könüllü şəkildə ağ bayraq qaldıraraq Azərbaycan tərəfinə təslim olmuş erməni hərbçisi Andranik Qriqoryanın açıqlamaları ilə bağlı danışıb: “Qriqoryan çıxışında bildirib ki, onun kimi Azərbaycana könüllü təslim olmaq istəyən çox sayda erməni olsa da, onları burada nə gözlədiyini bilmədikləri üçün gəlməyə qorxurlar. Ona görə də Azərbaycan dövləti olaraq, Dağlıq Qarabağ ermənilərinə qarşı fərqli siyasət yürütməli, ağ bayraq qaldıran erməniləri qəbul etməyə nə qədər hazır olduğumuzu nəzərdən keçirməliyik. Dağlıq Qarabağ ermənilərini Ermənistan dövlətinin avantürist siyasətindən azad etmək lazımdır”. Deputat İqbal Ağazadə isə bildirib ki, Qriqoryan Dağlıq Qarabağ sakini olduğu üçün, ona Azərbaycan parsportu verilməlidir. “Ümumiyyətlə, Qarabağ ermənilərinə Azərbaycan pasportu verilməlidir, çünki onlar Azərbaycan torpaqlarında anadan olublar. Həmin ermənilərin Azərbaycan tərəfindən bağışlanması üçün aidiyyəti orqanlar qərar qəbul etməlidir. Ən yaxşı addım Dağlıq Qarabağdakı ermənilərə Azərbaycan tərəfindən məcburi köçkün statusu verilməsi olar” – deyə İqbal Ağazadə bildirdi.

 Spiker Oqtay Əsədov isə bildirib ki, məcburi köçkün statusu verilsə, Ermənistanda adam qalmaz, hamısı Azərbaycana gələr.